Con motivo do 25N, levamos a cabo unha proposta didáctica a partir da lectura do conto “Artur e Clementina”. Para @s que non o coñecedes, por aquí vos deixamos un resumo e recomendación, por se queredes velo cos vosos peques:
Artur e Clementina son dúas tartarugas que se casan. Desde ese momento, Clementina quere facer moitos plans xuntos, pero Artur quere facelos el só. Ela abúrrese e busca entretemento con outras actividades, ao que el lle responde dándolle a entender que non será capaz de facelas, pois «é tonta». Ela rematou créndose esas palabras e deixou de falar. Despois de tempo aguantando esta situación, a tartaruga Clementina cansouse dela e decidiu saír a pasear e non volver á casa. Foise a onde era feliz e ninguén se ría dela.
Agora, explicámosvos como enfocamos as actividades levadas a cabo con este conto. Primeiro, realizamos unha lectura comprensiva do mesmo e respondemos unha serie de preguntas reflexivas para practicar a expresión escrita e reforzar a comprensión da información. Logo, de forma oral reflexionamos sobre a importancia deste día. E por último, escribimos nunha man de papel cinco conceptos esenciais que “están nas nosas mans” para construír unha sociedade máis igualitaria, e que este día deixe de ser necesario.
Esperamos que estas iniciativas vos gusten tanto como a nós. Consideramos que é moi importante que xa dende ben pequenos os nenos e nenas traballen cos conceptos de igualdade e non discriminación, para que cando sexan máis maiores constrúan un mundo onde cada vez todos e todas estemos máis seguros.
